Втора година по ред електронскиот портал „комарец“ ги додели признанијата за најуспешен млад спортист во Кочани за 2024 година во машка и женска конкуренција. Признанијата се доделуваат на млади спортисти до 15 годишна возраст од клубовите кои континуирано преку целата година ни доставуваат информации за нивните настапи на страна и натпреварите кои ние ги посетуваме кога се одржуваат во Kочани.
Годинава признанието „Најуспешен млад спортист на Кочани за 2024“ во женска конкуренција отиде во рацете на Ана Ајтовска, член на Клубот за Гимнастички Спортови „Кочани“ која во 2024 година го освои Првото место на Државниот натпревар во спортска гимнастика во сениорска конкуренција што се одржа во Битола и беше третопласирана на вториот Државен натпревар во спортска гимнастика што се одржа во Скопје.
Признанието „Најуспешен млад спортист на Кочани за 2024“ во машка конкуренција му припадна на дванаесетгодишниот Никола Данилов член на ГФК „Осогово“ кој инаку во претходните шест години поточно до пролетта 2024 година настапуваше за екипата на „Фудбал старс“ од Кочани.
Годинава наместо „Спортска личност на Кочани за 2024“ беше доделено признание за „Спортски настан на годината“. Годинава ова признание заврши во рацете на Љубомир Игнатов – Бубе, Марко Коцев и Филип Димитријев за успешно организираниот „Турнирот во баскет 3х3“ кој на заградениот спортски терен во дворот на ОУ „Кирил и Методиј“ и СОУ „Љупчо Сантов“ по слободна проценка во трите денови колку што траеше турнирот привлече околу 5.000 посетители..
Електронскиот портал „комарец“ и во тековната година ќе ги сумира резултатите на младите спортисти за да и следната година додели вакви признанија.
С. Ивановски
КОМЕНТАРИТЕ СО НАВРЕДЛИВА СОДРЖИНА И ВУЛГАРНОСТИ ЌЕ БИДАТ ИЗБРИШАНИ
