Амбулантно возило марка „Пежо Боксер“ од денес ќе биде на располагање на пациентите кои ќе побараат помош во Општа болница со проширена дејност – Кочани.
Со новото амбулантно возило ќе се обезбеди поголема мобилност на медицинските екипи и ќе биде од корист во извршувањето на медицинските услуги на населението.
Возилото е обезбедено од сопствени средства на Општа болница со проширена дејност – Кочани а истото е опремено со стандардна медицинска опрема, за превоз и интервенција на пациенти.
„По една деценија Јавната здравствена установа Општа болница од Кочани обезбеди ново амбулантно возило за потребите на пациентите во општината и регионот. Со ова драстично се подобрува состојбата на возниот парк во служба на пациентите. Возилото е обезбедено од сопствени средства на институцијата. Како здравствена институција продолжуваме да се стремиме да обезбедиме подобри услови за работа на медицинскиот персонал и задоволување на потребите на пациентите“, беше изјавата на Душанка Горгиева Трпевски, в.д директор на ЈЗУ Општа болница со проширена дејност – Кочани.
С. Ивановски
КОМЕНТАРИТЕ СО НАВРЕДЛИВА СОДРЖИНА И ВУЛГАРНОСТИ ЌЕ БИДАТ ИЗБРИШАНИ
