Дваесетина амбициозни млади лица успешно ја завршија дводневната интензивна обука за бизнис вештини, која се одржа во просториите на Ротари Феникс 2.0 центарот во Кочани. Настанот беше организиран од страна на Ротаракт клубот „Кочани-Виница“, во соработка со организацијата ЦЕФЕ Македонија.
Учење преку искуство, а не само теорија Фокусот на обуката беше ставен на интерактивниот пристап и искуственото учење. Наместо класични предавања, учесниците поминаа низ реални бизнис сценарија и симулации кои ги поттикнуваат да размислуваат како претприемачи, да носат одлуки во динамична средина и да се справат со предизвиците на реалниот пазар.
Јован Сталевски, претседател на ЦЕФЕ Македонија и еден од обучувачите, ја истакна важноста на овој метод: „Учесниците се ставаат во бизнис симулации каде ги искусуваат нештата што би се случиле доколку водат сопствен бизнис. Најважно е тие да сфатат дека пазарот е динамична форма и дека правилата се менуваат. Сакаме да ги охрабриме да гледаат решенија и можности за создавање нова вредност,“ истакна Сталевски.
Професионално менторство и стратешка соработка Обуката ја водеа искусните фасилитатори Јован Сталевски и професорката Весна Ефремова од Кочани, која е дел од мрежата на 25 активни ЦЕФЕ обучувачи во Македонија.
Овој настан е резултат на потпишаниот Меморандум за соработка помеѓу Ротари клубот „Кочани-Виница“ и ЦЕФЕ Македонија, што најавува долгорочна посветеност на овие организации кон едукацијата на младиот кадар во регионот.
За ЦЕФЕ методологијата ЦЕФЕ (CEFE) е германска методологија која на светско ниво е препознаена како една од најуспешните алатки за развој на претприемништвото. Во Македонија, ЦЕФЕ Македонија функционира како здружение од 2008 година, со мисија да го поттикне економскиот развој преку јакнење на капацитетите на поединците.
Локален придонес и идни планови Домаќин на овој настан беше Ротари Феникс 2.0 центарот, кој уште еднаш ја потврди својата улога на модерна платформа за едукација и развој на заедницата. Ротаракт клубот „Кочани-Виница“ најавува дека во иднина ќе продолжат со реализација на слични проекти насочени кон професионално усовршување на младите.
КОМЕНТАРИТЕ СО НАВРЕДЛИВА СОДРЖИНА И ВУЛГАРНОСТИ ЌЕ БИДАТ ИЗБРИШАНИ А НИВНИТЕ АВТОРИ БЛОКИРАНИ
