Во текот на вчерашниот ден Петок (15.11.2024 година), Медиумскиот клуб „КиМ Ко – инфо“ од ОУ „Св. Кирил и Методиј“ Кочани го прослави својот прв роденден. Беше организирана програма на која беа поканети и присуствуваа гости од локалната средина, родители, наставници, ученици и гости од Македонскиот институт за медиуми.
На прославата прво имаше забавен дел, гостите ги поздравија координаторката на клубот Лилјана Јовановска и директорот Драган Трајчев кои воедно врачија благодарници на поединци, институции, компании кои несебично ги поддржуваа активностите на клубот. Потоа учениците пред гостите преку презентација се претставија со сѐ што имаат реализирано годинава. Беше промовирана видеоанкетата „Што за мене претставува да сум член на КиМ Ко – инфо“ преку кое самите членови кажаа како го доживуваат тие самиот клуб и што значи тој за нив. Гостите добија пакет промотивен материјал – боенка и песнарка посветена на „КиМ Ко – инфо“, флаер со активностите на клубот и персонализирани пенкалца. Исто така на социјалните мрежи беше организиран квиз на знаење „Колку го познавам КиМ Ко – инфо“ преку кој играчите можеа да се забавуваат и да проверат колку помнат за активности на клубот.
За овој роденден Кимковците подготвија и се промовираше „Кимко боенка и песнарка“ која има хуманитарен карактер и е насловена „Од дете за дете“. Од продажбата и со собраните средства ќе бидат донирани разни забавни содржини на малите болни дечиња на Детското одделение во Градската болница кои ќе им го олеснат престојот таму и ќе им овозможат барем малце да заборават дека се болни, а ако останат средства ќе се посадат дрвца околу училиштето и за малку да си го прочистат воздухот и да се заштитат од бучавата.
Потоа гостите беа повикани да се пресече роденденската торта и да се заокружи оваа прослава на првиот училиштен медиумски клуб во Кочани.
КОМЕНТАРИТЕ СО НАВРЕДЛИВА СОДРЖИНА И ВУЛГАРНОСТИ ЌЕ БИДАТ ИЗБРИШАНИ
