Во моменти на колективна тага и болка, како заедница имаме обврска да бидеме сплотени, трпеливи и емпатични. Секој глас заслужува да биде сослушан, но повикуваме на воздржаност од напади, генерализации и обвинувања кои дополнително ја продлабочуваат болката на оние кои веќе се соочуваат со ненадоместливи загуби.
SupportKocani.com деновиве беше создаден како еден вид на платформа за обединување на поддршката – со цел транспарентно, човечно и организирано да се помогне на семејствата погодени од трагедијата.
„Нашата мисија е исклучиво хуманитарна и не е поврзана со никакви политички, лични или институционални интереси. Не сме тука да судиме, туку да помогнеме. Не поддржуваме ниту една политичка страна, не носиме заклучоци врз основа на гласини и не правиме разлики меѓу засегнатите – секој кој има потреба од помош, ќе ја добие“ истакнаа од SupportKocani.com.
„Во овие чувствителни моменти, најважно е да покажеме човечност. Апелираме да го насочиме вниманието и енергијата кон помагање и сплотување, наместо кон поделби. Само така, како заедница, ќе можеме да се издигнеме над болката и заеднички да создадеме услови за вистинска поддршка и закрепнување„ порачаа од SupportKocani.com
С. Ивановски
КОМЕНТАРИТЕ СО НАВРЕДЛИВА СОДРЖИНА И ВУЛГАРНОСТИ ЌЕ БИДАТ ИЗБРИШАНИ
