Кошаркарите на „Баскет Дино Деликатес“ од Кочани во една фуриозна игра го збришаа „Дибро Иглас“ од Дебар во првиот четврт финален натпревар во разигрувањето во Трета кошаркарска лига на Македонија.
Кочанчани заслужено славеа 109:73 (23:18; 26:16; 34:20; 26:19) со што направија голем исчекор за пласманот меѓу четирите екипи во Македонија.
Самиот резултат по четвртини кои сите ги добија домаќините ја отсликува реалноста на сето она што се случуваше во салата „Сашо Лазарев – Чапо“ во Кочани. На крилјата на своите навивачи кои прописно ги исполнија трибините кочанчани фуриозно започнаа и од минута во минута само ја зголемуваа разликата.
Тренерот Диванисов им даде шанса на сите играчи а тие му возвратија со тоа што сите се запишаа во листата на стрелците.
Сега претстои реванш натпревар во Дебар а евентуалната мајсторка ќе се одигра повторно во Кочани.
Кошевите за „Баскет Дино Деликатес“ ги постигнаа: Филипов 23, Лазарев 19, Илиев 14, Крстов 13, Ивановски 8, Крушарев 8, Томевски 5, Коцев 5, Ѕмбов 4, Сопков 4, Богданов 4, Романов 2.
С. Ивановски
