По повод одбележувањето на Месецот на книгата, кој трае од 15 октомври до 15 ноември, Јавната општинска установа библиотека „Искра“ од Кочани распиша Награден литературен конкурс за најдобар расказ на тема: Нејзиното височество – книгата.
„Целта на конкурсот, кој е наменет за ученици од основните и од средните училишта во Кочани, е да ја поттикне љубовта кон читањето книги, размислувањата и видувањата на прочитаното, но и да го зајакне писмениот израз кај младата генерација. Од друга страна, конкурсот е конципиран така што ги вклучува и учениците и наставниците по предметот Македонски јазик и литература, како и самите училишта“ вели Мара Анастасова, координаторка на конкурсот, виш библиотекар во „Искра“.
Право на учество на конкурсот имаат учениците од шесто до деветто одделение од основните училишта и учениците од прва до четврта година од средните училишта во општина Кочани.
Авторите конкурираат анонимно, со шифри на своите творби, а конкурсот е отворен до 31 октомври.
Најдобрите раскази ќе бидат рангирани со прво, второ и трето место во две категории: основно и средно образование. На првите места ќе им бидат доделени парични награди.
Прогласувањето на наградените ќе биде на 7 ноември 2022 година, а учениците со освоено прво место ќе ги прочитаат своите раскази на свеченото отворање на XVI Саем на книги во Кочани, кој исто така се организира по повод Месецот на книгата.
