Пет медали освоија каратистите на Карате Клуб „Кочани“ на Меѓународниот карате турнир „Фунакоши Гичин Опен“ што се одржа во Скопје.
Каратистите од Кочани на турнирот се појавија со девет натпреварувачи а на крајот беа освоени 1 златен, 2 сребрени и 2 бронзени медали.
Наталија Карова го освои златниот медал во категоријата „јуниорки“ до 48 килограми, а сребрените им припаднаа на Лука Ѓоргиев, категорија „кадети“ до 52 килограми и Илина Костадинова „ученици 10-11 години“ до 40 килограми. Бронзените медали завршија на градите на Илија Охомуш, категорија „јуниори“ до 76 килограми и Лука Златков „ученици 10-11 години“ до 46 килограми.
На турнирот зедоа учество 550 натпреварувачи од 45 клубови од 6 држави (Македонија, Србија, Црна Гора, Грција, Албанија и Косово).
„Задоволен сум од настапот на нашите натпреварувачи. Медалите се заслужено освоени, но со малку поголема спортска среќа можеа и другите четворица наши претставници да стигнат до некој медал. Но што е тука е, продолжуваме со работа и се надеваме на уште подобри резултати на претстојните натпреварувања“ беше изјавата на Игор Каров, тренер на КК „Кочани“ – Кочани.
С. Ивановски
КОМЕНТАРИТЕ СО НАВРЕДЛИВА СОДРЖИНА И ВУЛГАРНОСТИ ЌЕ БИДАТ ИЗБРИШАНИ
